Isang panibagong binhi ang sumusubok sumibol at umusbong sa kanyang sariling lakas at pangarap. Ito’y binhing inihasik ng grupo ng mga kabataan sa matabang lupa ng kanyang sariling bayan at pinagmulan. Binhing nagpupumiglas sa paglago at nasasabik sa mga bungang darating na balang araw ay kanyang malugod na ibabahagi sa mga taong umaasa at nag-aasam ng magandang bukas.

Ang HAGONOY YOUNG LEADERS PROGRAM (HYLEAP) ay isang samahan ng mga batang lider mula sa bayang ito na muling nagkasama-sama at sabay-sabay bumuo ng mga pangarap mula pa noong Marso 2008. Mga pangarap na sumasalamin sa kanilang malinis na adhikain para sa bayan ng Hagonoy at maging sa kinabukasan ng buong bansa at buong mundo. Ito ay naglalayong maghubog ng mga susunod na lider ng ating bayan sa pamamagitan ng paglulunsad ng iba’t ibang mga programa para sa bawat kabataan. Mga layuning naghahangad ng maganda at positibong pagbabago para sa buong bayan na magsisimula sa paghubog ng mabuting pananaw at kalooban ng isang lider-kabataan.

Ikinalulugod kong ibalita at ipagmalaki sa lahat na ako, katulad nila, ay bahagi rin ng samahang ito. Sapagkat nababanaag ng HYLEAP ang aking matibay na paniniwala at pag-asang mayroon pang magagawa upang muling masilayan ang pagsikat ng araw. Katulad ng aking mga kaibigan at kapanalig sa organisasyong ito, malugod kong ibinabahagi at inihahasik sa bayan ng Hagonoy ang binhing nagkukubli lamang sa aking puso’t diwa na ngayon ay may pagkakataon nang umusbong. Mga binhing hatid ay inspirasyon para sa aking kapwa kabataan na magsisimula sa bayang ito.

Noon pa man ang inyong lingkod ay naniniwala sa minsang tinuran ng ating pambansang bayaning si Dr. Jose Rizal na ang “kabataan ang pag-asa ng bayan.” Sa mabilis na paglipas ng panahon kasabay ng rumaragasang daloy ng modernisasyon, ang mga katagang ito ay patuloy nating pinaninindigan para sa ating bayan at mundong ginagalawan. Gaano man kalaki ang mga pagbabagong nasasaksihan natin sa daigdig na ito, ang kabataang Pinoy ay mananatiling isang nagniningas na sulo upang maghasik ng liwanag sa landas na tinatahak ng kanyang bayang sinilangan.